Hebridean Baker air adhart 'son duais Fortnum & Mason

Chaidh prògram Gàidhlig Hebridean Baker: Eileanan Nòrdach a chur air adhart airson duais a' Phrògraim as Fheàrr aig Duaisean Bìdh is Deoch Fortnum & Mason.

Air fhaicinn mar thè de na duaisean as cliùitiche ann am meadhanan a' bhìdh, tha an duais airson sàr-mhaitheis air feadh craoladh, sgrìobhadh agus cruthachadh susbaint.

Air a dhèanamh leis a' chompanaidh Caledonia TV, bha am prògram a' leantainn Choinnich MhicLeòid 's e a' tadhal air diofar eileanan anns na dùthchannan Nòrdach, 's e a' blasadh 's ag ionnsachadh mu chultar bìdh is fuinne nan diofar eileanan.

Thadhail e air Eileanan Lofoten ann an Nirribhidh, Gotland san t-Suain, Bornholm san Danmhairg, agus air na h-Eileanan Fàrach, a' faighinn rudan a bh' aig muinntir nan àitichean sin agus Coinneach fhèin, mar eileanaich, ann an cumantas.

"'S e urram dha-rìribh a th' ann a bhith air mo chur air adhart airson duaisean cliùiteach Fortnum & Mason," thuirt Coinneach MacLeòid.

"Tha e a' ciallachadh an t-uabhas sreath Gàidhlig fhaicinn air aithneachadh air an àrd-ùrlar seo, agus tha e nas sònraichte buileach a bhith ag aithneachadh gu bheil leithid Stanley Tucci agus Tom Kerridge am measg na th' air an duais a bhuannachadh roimhe."

Buinidh Coinneach do Chro Mòr air na Lochan ann an Leòdhas, agus tha e a' fuireach faisg air an Òban.

Tha na leabhraichean còcaireachd aige a' reic gu h-eadar-nàiseanta, agus e tric a' nochdadh air telebhisean a' BhBC, ITV, CBS agus companaidhean eile.

Thèid na duaisean thoirt seachad aig cuirm aig an Royal Exchange ann an Lunnainn Diardaoin an 30mh den Ghiblean, 's na toraidhean air am foillseachadh an ath là.