جیکسن: نیا میوزک ابھی ریلیز نہیں ہو گا
میوزک کے شائقین کا خیال تھا کہ مائیکل جیکسن نے موت سے قبل جو نیا میوزک ریکارڈ کرایا تھا وہ جلد ہی ریلیز کردیا جائے گا لیکن ایپک ریکارڈ کے صدر کا کہنا ہے کہ ابھی نہیں۔
ایمینڈا گھوسٹ کا کہنا ہے ’ہم مائیکل جیکسن کا احترام کرنا چاہتے ہیں اور ان کا میوزک اس وقت ریلیز کر کے ہم کسی کو یہ تاثر نہیں دینا چاہتے کہ ہم وقت کا فائدہ اٹھا رہے ہیں۔‘
مائیکل جیکسن کئی سالوں سے نئے میوزک پر ولیئم، نے یو اور اکون جیسے ہپ ہاپ اور آر اینڈ بی کے سٹار کے ساتھ کام کر رہے تھے۔
گھوسٹ نے بی بی سی سکس میوزک کو بتایا ’اگر ہم میوزک ریلیز کریں گے تو ہم چاہتے ہیں کہ وہ بہترین ہو تاکہ مائیکل جیکسن کی ساکھ کو کوئی نقصان نہ پہنچے۔ میں اس وقت یہ نہیں بتا سکتی کہ کب ریلیز ہو گا لیکن جب بھی ریلیز ہو گا سونی/ ایپک پر ہی ہو گا۔‘
نئے میوزک کی ریلیز میں تاخیر ہو سکتی ہے کیونکہ مائیکل جیکسن کی جائیداد پر قانونی چارہ جوئی کی جا رہی ہے۔
مائیکل جیکسن کی البمز تھرلر اور آف دی وال کے پروڈیوسر اور انجینیئر بروس سوئیڈیئن کا کہنا ہے کہ مائیکل جیکسن انسٹرومینٹل میوزک کے ساتھ ساتھ پوپ میوزک پر بھی کام کر رہے تھے۔
