Ўзбекистон, Абдураҳмон Ташанов: "Суд қарори бизнинг фойдамизга чиқди"
Сурат манбаси, gazeta.uz
Таниқли инсон ҳуқуқлари фаоли Абдураҳмон Ташанов ўзининг Facebook даги тармоғида Тошкентда кечган суд қароридан миннатдор эканлигини ёзган.
" Суд қарори бизнинг фойдамизга чиқди!
Икки соат аввал ЖИБ Миробод тумани суди судьяси М. Ахмедов Республика Ҳарбий прокурори томонидан менга нисбатан қўзғатилган маъмурий иш материаллари рад қилинди, иш қайтарилди. Сабаби маъмурий ишда жабрланувчи, умуман, аризачи мавжуд эмас. Бундай вазиятларда суд ишни кўрмайди.
Маъмурий иш материаллари махфийлаштирилгани, иш ёпиқ кўрилган боис тафсилотларга тўхтала олмайман. Аммо Ҳарбий прокуратура маъмурий иш материалларини жабрланувчи ёки аризачи билан тўлдириб келса, айбловнинг сохталиги яна ҳам аниқ бўлиб қолади.
Хуллас, иш синди ва бу мен учун адолат тантанасидир. Миробод судига ташаккур айтаман. Адолат рўёбга чиқиш учун унга ишонмоқ керак — мен шундай қилгандим", дейилади бу постда.
Икки кун аввал у ВВС боғланганида, у суд чоршанба куни Тошкент шаҳар Миробод тумани судида бўлиб ўтишини билдирганди.
"Эзгулик" инсон ҳуқуқлари жамияти раисининг ўз Фейсбук саҳифасида ёзишича, унга қарши Республика ҳарбий прокурори Отабек Холбоевнинг 28 феврал кунги қарори билан, унга нисбатан "ёлғон хабар тарқатиш" айби билан маъмурий иш қўзғатилган.
"Дастлабки суриштирув жараёни Ўзбекистон Реcпубликаси Ҳарбий прокуратурасининг ўта оғир жиноятларни тергов қилиш бошқармаси терговчиси, подполковник Тимур Муҳитдинов томонидан олиб борилди", - дейди Ташанов.
ВВС мустақил равишда иш материаллари билан танишмаган. Ташановнинг айтишича, маъмурий ишга Фейсбукдаги саҳифасида "Икки мулозим давлатга хоинликда айбланган", "Ваҳшиёна қийноқ, зўраки иқрорликлар. Маҳкум аҳволи оғирлигини иддао қилмоқда" ҳамда"Ваҳшиёна қийноқ, халқаро ташкилот баёноти ва прокурорнинг журъати" номли постлари, ҳамда Озодлик радиосига "Офис қурбони: Алламжоновга қарши кўрсатма учун қийнашди" номли кўрсатув доирасида берган интервьюси сабаб бўлган.
Тергов материалларида, Ташановга кўра, бу билан у Ўзбекистон Республикасининг қонуний равишда сайлаб қўйилган ҳокимияти ва орган вакилларининг қадр-қиммати камситилиши ва обрўсизланишига олиб келадиган ахборотларни тарқатгани айтилган.
End of Ижтимоий тармоқлардаги саҳифаларимиз
"Ҳолбуки, Ўзбекистон инсон ҳуқуқлари "Эзгулик" жамиятига мурожаат қилган фуқаро Баҳодир Абдуллаев ўғли Нозим Абдуллаевнинг Ўзбекистон Республикаси ДХХ Тергов бошқармасида мамлакатнинг юқори лавозимли шахсларига нисбатан кўрсатма беришга мажбурлангани, қийноқларга солингани ҳақидаги материалларни тақдим қилган. Менинг постларим доим мурожаат ва ҳужжатларга асосланади, бу мурожаатлар муаллиф томонидан Президентдан тортиб, Омбудсмангача 10 дан ортиқ идораларга бир йил давомида йўлланган", - деган эди инсон ҳуқуқлари фаоли.
Демократик ва қонун устувор бўлган давлатларда президент ва омбудсманга йўлланган мурожаатлар самарасиз қолгач, уларни жамоатчиликка очиқ тақдим қилиш легитим активизм ҳисобланади. Бу каби мурожаатлар жамоатчилик манфаатида бўлса, мурожаатчи аҳлоқан тўғри мавқедан келиб чиқиб амал қилса ва далил-исботларга эга бўлса, у судга тортилмайди.
OAV va ijtimoiy tarmoqlardagi chiqishlarim yuzasidan tegishli ekspertiza markazlarida o‘rganishlar olib borilayotganiga oid ma'lumotlar mavjud. Ehtiyotingizni qiling, deyishdi.
Абдураҳмон Ташанов кўп йиллардан бери Ўзбекистонда инсон ҳуқуқлари бузилиши ҳолларини ёритиб келади. У мунтазам равишда ноҳақ қамалгани иддао қилинган фуқаролар ишлари, ҳибс вақтидаги қийноқлар ва ўлимлар, ҳамда тутқунликдаги шароитларни омма эътиборига олиб чиқади.
Ўз фаолияти давомида у бир неча бор судга тортилган, аммо афтидан охирги йилларда бу ҳоллар тезлашган.
Ўтган йил майида Ташанов "Сизга ачинаман, жаноблар!" сарлавҳали пости учун Тошкент юридик университетининг икки ўқитувчига 50 миллион сўм маънавий зарарни тўлаши буюрилган суд қарори қабул қилинди. Постида Ташанов, хусусан, қуйидагиларни ёзганди: "Эшитишимча, Тошкент Давлат юридик университетининг бир қатор домлаларига менинг суд-ҳуқуқ тизимида учраётган муаммолар хусусидаги чиқишларимга раддиялар билдириш бўйича топшириқ бўлибди. Доцент-у профессорларнинг айтишича, мен оммада суд-ҳуқуқ тизимига ишончсизлик уйғотаётган эмишман. Гўё, халқимизда бу ахлат тизимга (президент Мирзиёев таъбири) ишонч юқоридек. Ҳолингиз хароб, домлалар, уялинг! Рамазон ойида сизларни дуо қиламиз, соғайиб кетинг".
