Cymdeithas labeli recordiau cyntaf Cymru am sicrhau 'dyfodol cynaliadwy'

Mae nifer o labeli recordiau Cymru wedi dod at ei gilydd i sefydlu cymdeithas labeli recordiau cyntaf Cymru gyda'r gobaith o "sicrhau dyfodol cynaliadwy a chefnogol i labeli a cherddorion Cymru".

Mae Cymdeithas Labeli Cymru'n dweud fod nifer y labeli Cymraeg wedi cynyddu ond bod yr heriau maen nhw'n eu hwynebu'n cynyddu hefyd.

Dywedodd y cerddor a chadeirydd y Gymdeithas, Yws Gwynedd, sy'n rhedeg cwmni Recordiau Côsh, fod y cydweithio rhwng labeli am "godi proffesiynoldeb ein diwydiant".

Ymhlith rhai o'r labeli sy'n rhan o'r gymdeithas mae Recordiau Côsh, Sain, Recordiau, Grwndi Rec-ords, Codi Pais Records a Mr Phormula.

Mewn datganiad, dywedodd: "Mae'r ffaith fod labeli Cymru wedi dod at ei gilydd i gydweithio fel un yn dangos y cynnydd gwych mae'r sîn gerddorol yng Nghymru wedi'i brofi'n ddiweddar.

"Drwy osod sylfaeni fel hyn, 'da ni'n siŵr o godi proffesiynoldeb ein diwydiant, a sicrhau dyfodol cerddoriaeth Gymreig gyda gweledigaeth y rhai sy'n gyfrifol am ei rhyddhau a'i hyrwyddo."

Dywedodd y Gymdeithas y bydd yr arweinyddiaeth yn newid yn flynyddol i sicrhau bod y rhaglen waith yn esblygu yn gyson.

Dywedodd is-gadeirydd y Gymdeithas, Hedydd Ioan, sy'n rhedeg y label INOIS, ei fod yn "anhygoel o gyffrous bod labeli Cymru yn dod at ei gilydd er mwyn datblygu'r partneriaethau cryf sy'n bodoli yn barod yn y diwydiant".

"Mae yna gymaint o weithgaredd a gwaith gwych yn dod o Gymru a dwi'n siŵr fydd y Gymdeithas Labeli yn gallu helpu i sicrhau fod y tyfiant yma'n un hirdymor a cynaliadwy," meddai.

"Mae cerddoriaeth Gymraeg yn cyfrannu gymaint tuag at ddiwylliant Cymru ac mae gallu gweld datblygiadau fel yma yn arwydd fod hynny am barhau am amser maith."

Wrth ymateb i'r newyddion dywedodd Huw Stephens fod y "gwaith mae labeli Cymru yn gwneud i hyrwyddo, hybu a rhyddhau cerddoriaeth o Gymru yn hollbwysig".

"Mae gymaint o waith caled yn mynd mewn i redeg y labeli," meddai.

"Dwi'n siŵr bydd hi'n fuddiol iddyn nhw ddysgu gan ei gilydd a chydlynu i hybu'r gerddoriaeth maen nhw'n gweithio gyda."

Ymysg y labeli sydd yn rhan o'r Gymdeithas mae Recordiau Côsh, INOIS, Fflach Cymunedol, Sain, Recordiau I KA CHING, Recordiau Libertino, Bubblewrap Collective, Recordiau JigCal, Grwndi Rec-ords, Sbrigyn Ymborth, Tarw Du, Meraki, Recordiau Sbensh, Lwcus T, Recordiau Bryn Rock, Recordiau MoPaChi, Codi Pais Records, a Mr Phormula.

Mae gwahoddiad agored i unrhyw label sydd yn rhyddhau mwy nag un artist ac yn rhyddhau cynnyrch Cymraeg neu ddwyieithog i ymuno â'r Gymdeithas.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.