Victoire Ingabire: Urukiko rw'ikirenga rw'u Rwanda rwatesheje agaciro ikirego cy'Umunyapolitiki utavuga rumwe n'ubutegetsi

Urukiko rw'ikirenga rwatesheje agaciro ikirego cy'Umunyapolitiki Victoire Ingabire wasabaga ko ingingo ya 106 yo mu gitabo cy'amategeko ahana, ikurwaho kuko ivuguruza zimwe mu ngingo z'itegekonshinga.

Ingabire watawe muri yombi mu kwezi kwa Kamena(6) umwaka 2025, avuga ko habayeho ukwivanga mu bubasha bw'ubushinjacyaha bwategetswe kumukoraho iperereza kandi bugomba gukora bwigenga .

Victoire Ingabire ni we watanze ikirego asaba ko ingingo ya 106 yo mu gitabo cy'amategeko ahana yemezwa ko inyuranya n'itegekonshinga bityo igakurwaho.

Iyi ngingo iha ububasha umucamanza bwo kuba yakurikirana umuntu utavugwaga mu rubanza runaka ariko hakaboneka impamvu zituma uyu muntu akekwa.

Ingabire avuga ko iyi ngingo yamwambuye uburenganzira buteganywa n'itegekonshinga bwogufatwa nk'umwere mu gihe atarahamwa n'icyaha.

Urukiko ariko ruvuga ko rusanga ihame ryo gufatwa nk'umwere ryarubahirijwe kuko hasabwe ko habaho iperereza kandi ko nta nkurikizi zari kubaho iyo ritabona ibimenyetso bimushinja .

Umucamanza yavuze ko yategetse ko habaho iperereza kuko izina rya Ingabire ryavugwaga kenshi mu rubanza rw'abantu 9 baregwa gushaka guhungabanya ubutegetsi.

Kuba umucamanza yarategetse ko habaho iperereza kandi ari inshingano z'ubushinjacyaha, Ingabire avuga ko habayeho kwivanga ku rwego mu mikorere y'urundi rwego.

Urukiko ariko rwo rusanga kuba umucamanza yarategetse ko hakorwa iperereza ari intambwe nziza ishimangira ubutabera kuko atari guhumiriza kandi abona umuntu akeka ko yaba yaragize ubufatanyacyaha murubanza afite imbereye .

Ikindi cyavuzwe hasomwa umwanzuro ni uko umucamanza yategetse ko hakorwa iperereza ariko ngo ntabwo yategetse ibigomba gusohoka nk'imyanzuro y'iperereza .

Ingabire yatawe muri yombi mukwezi kwa 6 k'umwaka ushize hashingiwe ku makuru yatanzwe murubanza rw'itsinda ry'abantu 9 baregwa ibirimo gushaka guhirika ubutegetsi .

Ubushinjacyaha buvuga ko aba baregwa bari abayoboke b'ishyaka DALFA UMURINZI ryashinzwe na Victoire Ingabire ariko rikaba ritaremererwa gukora byemewe n'amategeko y'U Rwanda .

Ingabire witabiraga uru rubanza nk'umuntu usanzwe yahise atabwa muri yombi ubwo umucamanza yategekaga ubushinjacyaha kumukoraho iperereza ndetse no kumushyikiriza urukiko mu gihe cy'iminsi 15.

Itsinda ryunganira Ingabire rivuga ko kuba umucamanza yarategetse ko hakorwa iperereza kandi ubushinjacyaha busanzwe burikora bwibwirije ni uko yinjiriye imikorere y'urundi rwego rwigenga.

Gusa urukiko rw'ikirenga ari na rwo rukiko ruruta izindi rukaba rwemeje ko ibyakozwe n'umucamanza wo hasi byari inzira zemewe zo gushakisha ubutabera.