Cù Flòraidh na threòraiche aig Caisteal Inbhir Nis

Bhrosnaich an cù a tha mar phàirt dhen ìomhaigh de Fhlòraidh NicDhòmhnaill aig Caisteal Inbhir Nis na daoine a tha a' ruith Turas Tro Chaisteal Inbhir Nis treòraiche do chloinn a chruthachadh.

Bidh an cù-chaorach ann an riochd cartùin ag innse mu na taisbeanaidhean anns a' chaisteal nuair a bhios e fosgailte dhan phoball.

Chuidich Flòraidh NicDhòmhnaill Am Prionnsa Teàrlach Eideart Stiùbhart nuair a bha e a' teicheadh bho na h-ùghdarrasan às dèidh Chùil Lodair ann an 1746.

Chan eil ainm a' choin a' nochdadh ann an cunntasan eachdraidheil sam bith, agus chaidh farpais do sgoilearan òga a chur air bhonn airson fear fhaighinn.

Bidh an fharpais fosgailte do chloinn anns a h-uile bun-sgoile air a' Ghàidhealtachd.

Tha an ìomhaigh de Fhloraidh NicDhòmhaill agus an cù air beulaibh Chaisteil Inbhir Nis.

Tha an seann chùirt is phrìosan ga leasachadh mar àite do luchd-tadhail an-dràsta agus bu chòir dha a bhith a' fosgladh dhan mhòr-shluagh am-bliadhna.

Cosgaidh an obair sin mu £30m.

Fhuair am pròiseact taic bho Aonta Sgìreil Inbhir Nis agus na Gàidhealtachd, a tha luach £315m uile gu lèir.

Bidh "turas" tro eachdraidh na Gàidhealtachd anns a' chaisteal.

Bha am Prionnsa Teàrlach agus luchd-taic fo choill às dèidh Chùil Lodair agus bha Flòraidh NicDhòmhnaill, a bha a' fuireach ann am Beinn na Faoghla, am measg na rinn cobhair air.

Smaoinich i air a chur ann an aodach boireannaich airson a dhol dhan Eilean Sgitheanach, far an d' fhuair e cuideachadh.

Fhuair e air teicheadh dhan Fhraing mu dheireadh thall.

Tha cothrom feuchainn air an fharpais an seo, taobh a-muigh is e fosgailte chun an 19mh den Chèitean.