Top US counterterrorism official Joe Kent resign ova Iran war

Top official on counterterrorism under Donald Trump administration, Joe Kent don resign from im position sake of im opposition to di war for Iran.

Kent also ask President Trump to "reverse course".

For letter wey e post on Tuesday to im X account, National Counterterrorism Center Director Joe Kent say dat Iran pose "no imminent threat" to di US.

E say di Trump administration "start dis war due to pressure from Israel and dia powerful American lobby".

Kent wey be 45 years, na US special forces and CIA veteran wey im wife, navy cryptologic technician Shannon Kent, die for suicide bombing for Syria in 2019.

Di BBC don contact di White House for comment on Kent resignation.

Why Joe Kent resign

Wit im departure, Kent become di most high-profile figure from within di Trump administration to publicly criticise di US-Israeli operation for Iran.

For di letter, Kent say e previously support Trump foreign policy platform and until last year wey e believe say e don understand di wars for di Middle East.

"Di wars for di Middle East dey rob America of di precious lives of our patriots and deplete di wealth and prosperity of our nation."

Additionally, Kent allege say "high-ranking Israeli officials" and influential US journalist use "misinformation" wey cause Trump to undermine im "America First" platform.

"Dis echo dey used to deceive you into believing say Iran post imminent threat to di United States. Dis na lie."

Kent na long-time supporter of Trump wey unsuccessfully run for Congress twice. Dem narrowly confam im post for July last year, wit many Democrats wey criticise im links to extremist groups including members of di Proud Boys.

For di confirmation hearing, Kent also refuse to back away from claims say federal agents start di January 6 riots for di US Capitol or say Trump win di 2020 election.

For di National Counterterrorism Center, Kent report to Director of National Intelligence Tulsi Gabbard and oversee di analysis and detection of potential terrorist threats from around di globe.

Previously, Kent don deploy 11 times oversea wit di US military, including wit di US Army special forces for Iraq.

E later become paramilitary officer for di CIA, bifor leaving govment service afta im wife death.

Kent tok about im military service and her death for im letter, say e no fit "support to send di next generation off to fight and die for war wey serve no benefit to di American pipo or justify di cost of American lives."

Profile of Joe Kent

Joe Kent serve as di Director of di National Counterterrorism Center (NCTC).

For di role Kent lead di U.S. counterterrorism and counternarcotics enterprise and serve as di principal counterterrorism advisor to di President.

Kent na from Oregon and graduate of Norwich University for Strategic Defense Analysis.

E serve for di U.S. Army for 20 years, wia e complete 11 combat deployments for di Middle East and oda high-threat regions.

During im time flor di Army, e serve wit di 75th Ranger Regiment, Army Special Forces and U.S. Army Special Operations Command, and received plenti military commendations, including six bronze stars.

Afta e retire from di Army di 2018, e serve as paramilitary officer for di CIA Special Activities Center.

Shannon Kent: Who be Joe Kent wife wey die for 2019

Shannon Kent na former United States Navy officer wey die for di 2019 Manbij bombing.

Kent and im family devote dia lives to counterterrorism and keeping di American pipo safe.

For 2019, Kent wife, wey be Navy Senior Chief Petty Officer Shannon, die for suicide bombing while she dey serve for Syria.

Na her legacy and sprit, along wit countless oda men and women wey don lose dia lives for di war on terror dey drive di mission for National Counterterrorism Center (NCTC).