Facal Oirbh, BBC Radio nan Gàidheal, 21 Giblean 2009

Gàrraidhean

Gàrradh a' Mharr

Thàinig fios bho Sheòras MacÌomhair bhon a' Bhac a bha fuireach ann an Steòrnabhagh gu robh làn chuimhne aige air an seo. Tha e coltach gu robh an gàrradh seo mu choinneamh far a bheil Banca Rìoghail na h-Alba, eadar sin agus bàrr a' chidhe. Tha e air ainmeachadh air fear Bucach air an robh Iain Marr. Bha togalach aige ann an sin agus 's ann a' reic salann garbh ri na cùbairean a bha e.

Bha cuideigin eile ag ràdh gu robh daoine a' tighinn gu Gàrradh a' Mharr 's a' suidhe air a' ghàrradh fad an latha, ann an dòchas gu faigheadh iad àite air tè de na bàtaichean Bucach a bhiodh a' tighinn a-steach a Steòrnabhagh. "Bha Gàrradh a' Mharr mar employment exchange !" thuirt e.

An Gàrradh Leisg

Bha Seòras MacÌomhair cuideachd ag innse ged a tha àite ris an canar Lazy Corner ann an Steòrnabhagh an-diugh nach b' ann buileach an sin a bha An Gàrradh Leisg. Tha Lazy Corner air a' Mhol a Tuath, shìos air a' chidhe mu choinneamh oifis Urras Steòrnabhaigh, ach bha An Gàrradh Leisg mu choinneamh bonn Sràid na h-Eaglaise. Bhiodh muinntir a' Bhac, nuair a bhiodh iad a' tighinn a Steòrnabhagh a' reic an cuid adagan, ag ràdh "Tasdan an gad, 's an t-sreang air ais!"

Agus an t-iasg nach b' urrainn dhaibh a reic, bhiodh iad ga reic aig a' Ghàrradh Leisg. Tha e coltach gum biodh tòrr dhaoine a' cruinneachadh aige.

Gàrradh an Acrais

Bha e thall taobh Talla a' Bhaile.

Gàrradh a' Fhrangaich

Na leanadh tu ort sìos an t-sràid bho Ghàrradh a' Mharr cho fada sìos 's a gheibheadh tu, thigeadh tu gu Gàrradh a' Fhrangaich. Ann an Steòrnabhagh bha aon ghàrradh a' leantainn a-steach do ghàrradh eile.

Gàrraidhean agus Banntraichean

Nuair a bhathas a' togail nan gàrraidhean gu h-àraid timcheall nam bailtean, mar eisimpleir ann am Beàrnaraigh Leòdhais, bha 'd garbh miannach air a bhith a' toirt beagan obrach do na banntraichean air sgàth 's nach biodh teachd-a-steach san dachaigh idir. Ach cha robhas gam pàigheadh le airgead ach le min-Innseanach airson an cuid chloinne a bhiathadh.