TOOS, Maraakiib sheegay in 'rasaas ay kusoo rideen' doonyaha hubka ee Iran iyadoo Tehran ay mar kale xirtay marin biyoodka Hormuz

Tebin toos ah

1. 2 Saacadood ka horCiidamada Israa’iil oo war cusub soo saaray

   Ciidanka Difaaca Israa’iil (IDF) ayaa sheegay in askari uu dhintay ka dib markii uu ku dhaawacmay dagaal ka dhacay koonfurta Lubnaan maalintii Jimcaha.

   Tani waxay daba socotaa xabbad-joojin 10 maalmood ah oo u dhaxaysay Lubnaan iyo Israa’iil, taas oo bilaabatay 16-kii Abriil.

   War qoraal ah oo ay soo saareen, IDF waxay ku sheegeen in askarigu uu "u dhintay dhaawacyadii soo gaaray ka dib markii lagu dhaawacay dagaal" ka dhacay aaggaas. Sidoo kale, saddex askari oo kale ayaa ku dhaawacmay, sida ay sheegeen IDF.

   Ma jiraan faahfaahin dheeraad ah oo laga bixiyay dhacdadan.

   Mar sii horreysay, IDF waxay sheegeen inay "diyaar-garow sare ku jiraan, ayna sii wadi doonaan inay ka saaraan khataraha koonfurta Lubnaan, guud ahaan aagga u dhexeeya xadka Israa’iil iyo xariiqda loo qoondeeyay," iyagoo intaas ku daray in tani ay tahay "mid waafaqsan fahamka xabbad-joojinta."

   Maalintii Jimcaha, warbaahinta dowladda Lubnaan ayaa sheegtay in weerar dhinaca cirka ah oo ay fulisay Israa’iil uu ku dhintay hal qof.

2. 3 Saacadood ka horGuddoomiyaha Barlamaanka Iiraan oo fariin u diray shacabkiisa iyo qodobo kale oo ka hadlay

   

   Xigashada Sawirka, WANA/Reuters

   Guddoomiyaha Baarlamaanka Iiraan, Mohammad Bagher Ghalibaf, ayaa ku tilmaamay go’doominta Mareykanka ee dekedaha Iiraan “go’aan si xun loo qiimeeyay oo khaldan”.

   "Waxaan hore u sheegay haddii aysan qaadin go'doominta, in xaqiiqdii la xaddidi doono isu-socodka minka," ayuu Ghalibaf u sheegay telefiishanka qaranka Iiraan.

   Farriin muuqaal ah oo uu u diray shacabka Iiraan, Ghalibaf ayaa sheegay in Marinka Hormuz uu yahay mid "ay gacanta ku heyso" Iiraan.

   Waxa uu sidoo kale sheegay in markii uu Maraykanku rabay inuu fuliyo hawlgallo miino-baaris ah oo ka dhex dhaca marinka, ay Iiraan “si adag u istaagtay ayna ka hortagtay” Maraykanka.

   “Waxaan u aragnay arrintan xad-gudub ka dhan ah xabbad-joojinta, waxaanna sheegnay haddii ay tallaabadaas qaadaan, inaan weerari doono,” ayuu yiri Ghalibaf.

   Ghalibaf ayaa noqday mid ka mid ah shaqsiyaadka ugu muhiimsan nidaamka Iiraan tan iyo markii dagaalku bilowday, wuxuuna hoggaaminayay wafdigii wadahadalladii u dambeeyay ee u dhexeeyay Mareykanka iyo Iiraan ee ka dhacay Islamabad.

3. 4 Saacadood ka horAbiy Axmed: 'Geeska Afrika nabad lagu wada joogi maayo hadii aan Itoobiya bad helin'

   

   Xigashada Sawirka, Getty Images

   Gobolka Geeska Afrika ma heli doono nabad ilaa Itoobiya ay hesho marin badeed, ayuu yiri Ra'iisul Wasaare Abiy Axmed.

   Waxa uu sheegay in arrinta ku saabsan badda Itoobiya ay tahay mid looga baahan yahay dhammaan shacabka iyo hay'adaha sheeganaya inay ka walaacsan yihiin horumarka iyo nabadgalyada gobolka in ay il gooni ah ku eegaan.

   Wareysi gaar ah oo uu siiyay warbaahinta qaranka dalka Itoobiya ee EBC, oo laga sii daayay labo qeybood ayuu ku sheegay in bad la'aantu ay abuureyso liidnimo in Itoobiya aysan ku tartamin warshadaha.

   "Waxyaabaha ugu waaweyn ee Itoobiya u diidaya inay noqoto dal quudiya muwaadiniintiisa, oo isku filan oo tartan caalami ah gali kara waa dekedo la'aan."

   Kadib markii dhawaan ay Iran xirtay marin biyoodka Hormuz ayaa waxa uu saamayn ku yeeshay wadamada oo caalamka ah.

   Halkan ka sii akhri sheekada

4. 4 Saacadood ka horWaa kuma sarkaalka sare ee ka tirsan ciidamada Ilaalada Kacaanka Iiraan ee gaaray Ciraaq?

   Sarkaal sare oo Ciraaqi ah ayaa u sheegay AFP in taliyaha Ciidanka Quds ee Ilaalada Kacaanka Iiraan, Ismaaciil Qaaani, uu Sabtidii gaaray caasimadda Ciraaq ee Baqdaad, taasoo ah booqashadiisii ugu horreysay tan iyo markii xabbad-joojinta u dhexeysa Mareykanka iyo Iiraan ay dhaqan gashay 8-da Abriil.

   Booqashadan, oo ay sidoo kale xaqiijiyeen ilo ka tirsan “Qaab-dhismeedka Isku-duwidda” iyo kooxaha hubeysan, ayaa ujeedadeedu tahay inuu kulamo la yeesho hoggaamiyeyaasha siyaasadda iyo wakiillo ka socda kooxaha hubeysan si looga wada hadlo saameynta dagaalka Bariga Dhexe iyo sida uu u saameynayo Ciraaq.

   Sarkaalku wuxuu tilmaamay in Qaaani uu doonayo inuu isku dubbarido mowqifyada xulafada Tehran isla markaana uu hubiyo in xaaladda amni aysan ka sii darin muddadan xasaasiga ah, iyadoo diiradda la saarayo arrinta “dejinta xiisadaha gobolka”.

   Booqashadan aan hore loo shaacin waxay ka tarjumaysaa caqabadaha weli horyaalla hoggaamiyeyaasha Ciraaq ee ku aaddan ilaalinta dheelitirnaan jilicsan oo u dhexeysa labada xulafo ee isdiidan, Washington iyo Tehran, gaar ahaan ka dib markii gudaha Ciraaq uu saameeyay khilaafka gobolka iyada oo ay is-weydaarsadeen weerarro kooxo ay Iiraan taageerto iyo danaha Mareykanka.

5. 4 Saacadood ka horCiidamada Iiraan oo war hor leh soo saaray Hormuz

   Faahfaahino dheeraada ayaa ka soo baxaya ciidamada badda ee Iiraa, waxayna sheegayaan in laga bilaabo fiidnimada caawa uu xiran yahay Marinka Hormuz, ilaa inta laga qaadayo go'doominta uu Mareykanku ku hayo dekedaha Iiraan.

   Bayaan ka soo baxay Ciidanka Ilaalada Kacaanka Islaamiga ah (IRGC) ayaa looga digay in "aysan jirin wax markab ah oo ka dhaqaaqi kara halka uu ku xiran yahay ee Gacanka Faarisi ama Badda Cumaan."

   Waxay sidoo kale sheegeen in dhowr markab ay mareen marinka tan iyo xalay iyagoo hoos imanaya maamulkooda, balse marin-biyoodka dib loo xiri doono ilaa Mareykanku joojiyo go’doominta dekedaha Iiraan.

   Bayaanka ayaa lagu soo gabagabeeyay: "U dhawaanshaha Marinka Hormuz waxaa loo tixgelin doonaa iskaashi lala leeyahay cadowga, markabka ku xadgudba amarkaasna waa la beegsan doonaa."

6. 5 Saacadood ka horKabtanka ku go'doonsan markabka ayaa sheegay in shaqaaluhu ay rajeynayaan 'in ay ku laabtaan guryahoodii'

   Kabtan Raman Kapoor ayaa ku xanniban, isaga iyo 23 xubnood oo ka tirsan shaqaalihiisa, markab shidaal qaada oo ku dhow marinka Hormuz tan iyo markii uu dagaalku bilowday.

   Wuxuu u sheegay barnaamijka Weekend ee BBC n shaqaalihiisu ay la dareemayaan “dareenno isku dhafan” tan iyo markii dagaalku bilaabmay. Wuxuu sidoo kale sheegay inay toddobaadyadii u dambeeyay si joogto ah u arkeen gantaallo iyo qarax ka dhacay meel u dhow markabkooda.

   Si kastaba ha ahaatee, wuxuu intaas ku daray inay si dulqaad leh oo xirfad leh u sugayeen xaaladda.

   “Waxaan rajeynaynaa inaan dib ugu laaban doono guryaheena,” ayuu yiri.

7. 6 Saacadood ka horwasiir ka tirsan Iran: Iran diyaar uma aha inay wadahadalo dheeraad ah la yeelato Maraykanka,

   

   Xigashada Sawirka, Getty Images

   Ku-xigeenka Wasiirka Arrimaha Dibadda ee Iran ayaa sheegay in dalkiisu uusan diyaar u ahayn wareeg cusub oo wadaxaajoodyo fool-ka-fool ah oo uu la yeesho Mareykanka, sida ay sheegtay wakaaladda wararka ee AP.

   Sababtuna ayuu wasiirka ku sheegay inay tahay in Washington aysan diyaar u ahayn inay ka tanaasusho waxa uu ku tilmaamay dalabyo “xad-dhaaf ah” oo ku saabsan arrimo muhiim ah.

   Saeed Khatibzadeh ayaa sidoo kale AP u sheegay in Tehran aysan u wareejin doonin uranium-keeda la kobciyay Mareykanka, isagoo arrintaas ku tilmaamay “mid aan suurtagal ahayn”, inkastoo hadallo ka duwan uu Jimcihii sheegay Madaxweynaha Mareykanka, Donald Trump.

   Khatibzadeh wuxuu sheegay in xiriir uu jiray oo u dhexeeya labada dhinac, balse Iran ay rabto in marka hore la dhammeeyo “heshiis qaab-dhismeed”ka hor inta aan la gelin wadaxaajoodyo toos ah.

   Wuxuu intaas ku daray in Mareykanka uu u baahan yahay inuu “fahmo oo wax ka qabto walaacyada ugu waaweyn” ee Iran, oo ay ka mid yihiin cunaqabateynta lagu soo rogay dalka.

   Horaantii maanta, Trump ayaa sheegay in ay socdaan “wada hadallo aad u wanaagsan” oo u dhexeeya Mareykanka iyo Iran.

8. 6 Saacadood ka horGolaha Sare ee Amniga Qaranka Iran: Waxaan darseynaa soo jeedinno cusub oo ka timid Mareykanka.

   Golaha Sare ee Amniga Qaranka ee Iran (SNSC) ayaa maanta ku dhawaaqay in dalka uu daraasad ku samaynayo “soo-jeedimo cusub” oo ka yimid Mareykanka, isagoo sidoo kale ka digay in wadahadallada Iran aysan wax tanaasul ah u samayn doonin Washington.

   War-saxaafadeed uu goluhu soo saaray oo lagu daabacay warbaahinta rasmiga ah ayaa lagu yiri: “Maalmihii u dambeeyay, iyadoo taliyaha ciidanka Pakistan uu ku sugnaa Tehran oo dhexdhexaadin ka ah wadaxaajoodyada, Mareykanku wuxuu soo bandhigay soo-jeedimo cusub, kuwaas oo Jamhuuriyadda Islaamiga ah ee Iran ay hadda daraasad ku hayso, welina jawaab kama bixin.”

   War-saxaafadeedka ayaa intaas ku daray in wafdiga wadaxaajoodyada Iran “uusan sameyn doonin wax tanaasul ah, dib u gurasho, ama heshiis dhexdhexaad ah, isla markaana uu si buuxda u difaaci doono danaha shacabka Iran.”

   Soo bandhigista soo-jeedimahan cusub ayaa timid saacado kadib markii Iran ay ku dhawaaqday inay dib u xidhay marinka Hormuz, iyadoo jawaab u ah xayiraadda joogtada ah ee Mareykanka ku hayo dekedaheeda. Tani waxay keentay in Madaxweynaha Mareykanka Donald Trump uu uga digto Washington isku day kasta oo “caburin” ah.

   Golaha Sare ee Amniga Qaranka ayaa sheegay in “Iran ay go’aansatay inay si buuxda u maamusho oo u kormeerto maraakiibta mara marinka Hormuz ilaa dagaalku gebi ahaanba ka dhammaanayo,” isagoo xusay in xayiraadda Mareykanka ay ka hortagayso xitaa “furitaan xaddidan oo shuruudo ku xiran.”

9. 7 Saacadood ka horTehraan ayaa ugu baaqday Ururka Iskaashiga ee Shanghai inuu cambaareeyo weerarada Israel iyo Mareykanka ee Iran

   Jamhuuriyadda Islaamiga ah ee Iran ayaa ugu baaqday Ururka Iskaashiga Shanghai (SCO) inuu cambaareeyo weerarradii dhowaan ay fuliyeen Mareykanka iyo Israa’iil.

   Wakaaladda wararka ee rasmiga ah ee IRNA ayaa sheegtay in Mohammad Rasoul Jafari, wakiilka joogtada ah ee Iran u fadhiya SCO, uu codsigan u gudbiyay isagoo ku hadlaya magaca Tehran.

   Ururka Iskaashiga Shanghai (SCO) wuxuu leeyahay 10 xubnood oo rasmi ah, kuwaas oo ay ku jiraan Iran, Pakistan, iyo Belarus. Afghanistan iyo Mongolia waa xubno kormeere ah, halka 16 dal—oo ay ka mid yihiin Turkey, Azerbaijan, Masar, Qatar, iyo Imaaraadka Carabta—ay yihiin “la-hawlgalayaal wada-hadal” ee ururka.

   Doorka ururkan badanaa waa mid astaan uun ah , balse wuxuu siinayaa hoggaamiyeyaasha fursad ay ku muujiyaan aragtiyahooda iyo dhaliilaha ay wadaagaan.

10. 7 Saacadood ka horHindiya:Laba markab oo calanka Hindiya sita ayaa ku lug lahaa 'shil toogashada' oo ka dhacay Strait - wasaaradda arrimaha dibadda

    Xoghayaha Arrimaha Dibadda ee Hindiya, Vikram Misri, ayaa sheegay inuu ka walaacsan yahay dhacdo rasaas ah oo galinkii hore ee Sabtidii uga dhacday laba markab oo sita calanka Hindiya kuwaas oo marayay marinka Hormuz.

    War uu soo saaray, Misri wuxuu ugu baaqay Iran inay dib u bilowdo fududeynta maraakiibta u socda Hindiya si ay uga gudbaan marinka si nabad ah.

    Tani waxay daba socotaa warbixinno ka yimid haya'adda badaha UK ee (UKMTO) oo sheegtay in saddex markab—mid shidaal sida, mid xamuul ah, iyo mid rakaab ay dhammaantood soo sheegeen dhacdooyin ka dhacay xeebaha Cumaan Sabtidii.

11. 8 Saacadood ka horSafiirka Iran u fadhiya Hindiya ayaa looga yeeray wasaaradda arrimaha dibadda ee dalkaas

    Wasaaradda Arrimaha Dibadda ee Hindiya ayaa u yeertay safiirka Iran, waxayna muujisay walaac weyn oo ay ka qabto rasaasta lagu furay laba markab oo sita calanka Hindiya kuwaas oo marayay marinka Hormuz.

    Iyadoo tixraacaysa in Iran horey u siisay marin ammaan ah dhowr markab oo u socday Hindiya, Wasaaradda Arrimaha Dibadda ee Hindiya ayaa safiirka Iran ka codsatay inuu aragtida dowladdiisa u gudbiyo mas’uuliyiinta Iran, isla markaana dib loo bilaabo sida ugu dhaqsaha badan fududeynta maraakiibta u socda Hindiya inay si nabad ah uga gudbaan marinka Hormuz.

    Waxaa horey loo sheegay in Ciidamada Ilaalada Kacaanka (IRGC) ay ku qasbeen laba markab oo Hindi ah oo marayay galbeedka marinka Hormuz inay dib u laabtaan.

    Website-ka Tanker Trackers, oo la socdo dhaqdhaqaaqa maraakiibta shidaalka, ayaa sheegay in dib u noqoshadaas lagu qasbay ay la socotay “rasaas la furay.”

12. 8 Saacadood ka horDhacdooyiinkii ugu waawaynaa ee maanta ka dhacay marinka hurmuz

    

    Xigashada Sawirka, Reuters

    Weerar maraakiibta Laba doon oo dagaal oo ka tirsan Ciidanka Ilaalada Kacaanka Islaamiga ah ee Iran (IRGC) ayaa rasaas ku furay markab shidaal sida marayay marinka Badda ee Hormuz, sida ay sheegtay hay'adda badaha UK ee UKMTO). Shaqaalaha markabka ayaa la sheegay inay bad qabaan.

    Markab xamuul oo konteenarro sida ayaa sidoo kale waxaa ku dhacay “gantaal aan la garanayn” meel 25 mayl-badeed u jirta waqooyi-bari Cumaan, taas oo waxyeello gaarsiisay qaar ka mid ah konteenarradii, ayay UKMTO sheegtay.

    Marinka Hormuz Golaha Amniga Qaranka Sare ee Iran (SNSC) ayaa sheegay inuu “go’aansaday” inuu gacanta ku hayo marinka ilaa dhammaadka dagaalka.

    Tani waxay timid kadib markii IRGC ay sheegtay in marinku “ku laaban doono xaaladdiisii hore”, iyadoo ciidamada qalabka sida ay si buuxda u maamulayaan aagga.

    Madaxweynaha Mareykanka Donald Trump ayaa sheegay inuusan ogolaan doonin inay Iran “ caburiso” Mareykanka.

    Dhanka kale, Mareykanka ayaa sheegay inuu celiyay 23 markab tan iyo markii uu bilaabay xayiraadda badda 13-kii April.

    Golaha qaranka Iiraan ayaa xayiraadda ku tilmaamay mid jebinaysa heshiiska xabbad-joojinta.

    Lubnaan

    Askari Faransiis ah oo ka tirsanaa howlgalka nabad ilaalinta Qaramada Midoobay ayaa la dilay, sida uu sheegay Madaxweyne Emmanuel Macron. Wuxuu tilmaamay in Hisbullah ay mas’uul ka tahay, balse kooxda Iran taageerto ayaa beenisay eeddaas.

    Ciidamada Difaaca Israa’iil (IDF) ayaa sheegay inay dhiseen xariiq amni oo loo yaqaan “yellow line” ama khadka cagaaran oo ku taal koonfurta Lubnaan, isla markaana ay duqeeyeen “argagixiso” ku soo dhowaaday askartooda.

13. 9 Saacadood ka horMilateriga Israa'iil oo markii ugu horreysay sheegay 'khadka jaalaha ah'oo amman ay ka hirgalinayaan Lubnan

    Militariga Israa'iil ee (IDF) ayaa sheegay in ay sameeyeen waxa ay ugu yeereen “khad jaalle ah” oo ah xuduud amni oo ka hirgalaysa koonfurta Lebanon.

    Tani waa markii ugu horreysay ee IDF ay si rasmi ah uga hadasho xuduud noocan ah tan iyo markii xabbad-joojin dhex martay Israa’iil iyo Hisbullah ay bilaabatay habeenkii Khamiista, iyadoo Ra’iisul Wasaaraha Israa’iil Benjamin Netanyahu uu ku dhawaaqay in la sameynayo aag amni oo dheerarkiisu yahay 10 km gudaha Lubnaan.

    IDF waxay sheegeen inay duqeysay “dagaalyahanno” ay ku eedeysay inay jebiyeen heshiiska xabbad-joojinta iyagoo uga soo dhowaaday ciidamada Israa’iil dhanka waqooyi ee khadkaas.

    Ilaa hadda lama hayo faahfaahin rasmi ah oo ku saabsan khasaaraha ka dhashay weerarka.

    Israa’iil waxay sheegtay in askarteedu ay xaq u leeyihiin inay ka falceliyaan khatar kasta xitaa inta lagu jiro xabbad-joojinta.

    Ma jirto jawaab ka timid dhanka Xisbullah ama dowladda Lubnaan.

14. 18 Abriil 2026Trump oo ka hadlay tallaabooyiinkii u dambeeyay ee ay Iran qaaday

    

    Xigashada Sawirka, Reuters

    Donald Trump ayaa ka hadlay xaaladda Iran isagoo ku sugan Xafiiska Oval ka hor inta uusan ka jawaabin su’aalaha saxafiyiinta intii lagu guda jiray saxiixa amarro fulineed.

    Wuxuu sheegay in ay jiraan “wada-hadallo aad u wanaagsan oo socda” oo la xiriira Iran, balse wuxuu ku tilmaamay in Iran ay u dhaqmayso “si yar oo kaftan ama xeelad ah sida ay samaynayeen 47 sano ee la soo dhaafay.”

    Trump wuxuu sidoo kale sheegay in hoggaamiyeyaasha Iran ay doonayaan inay xiraan Hormuz, balse Mareykanku uusan oggolaan doonin in la “rakaato iyo caga-jugleyn” lagu sameeyo.

    Wuxuu intaas ku daray in Mareykanku uu qaadanayo mowqif adag oo ku saabsan arrintan.

15. 18 Abriil 2026Golaha ammaanka Iran:Iran waxay go'aansatay inay maamusho marin biyoodka ilaa dhamaadka dagaalka,

    Golaha Sare ee Amniga Qaranka ee Iran, oo ah hay’adda ugu sarreysa amniga dalka, ayaa sheegay telefishinka dowladda in Tehran ay “go’aansatay inay hirgeliso kormeer iyo xakameyn ku saabsan marista maraakiibta ee marinka Hormuz ilaa dhammaadka kama dambaysta ah ee dagaalka iyo hirgelinta nabad waarta oo gobolka ah.”

    Bayaan-ka ayaa lagu sheegay in tallaabadan lagu fulin doono iyadoo la ururinayo xog dhammaystiran oo ku saabsan maraakiibta maraya, la siinayo shahaadooyin oggolaansho safar , iyo in laga qaado lacagaha adeegyada la xiriira marista.

    Tani waxay muujinaysaa in Iran ay dooneyso inay si rasmi ah u nidaamiso oo u maamusho socodka maraakiibta maraya marinka Hormuz, oo ka mid ah marinnada ugu muhiimsan ee ganacsiga tamarta caalamiga ah.

16. 18 Abriil 2026Ilaalada Kacaanka Iiraan oo dib u celiyay Maraakiib marayay Hurmuz

    Websayt-ka TankerTrackers, oo la socda dhaqdhaqaaqa maraakiibta shidaalka, ayaa sheegay in ay heleen macluumaad cod ah oo muujinaysa in Ciidamada Badda ee ilaalada kacaanka Iiraan ee (IRGC) ay ku qasbeen laba markab oo Hindiya laga leeyahay oo marayay galbeedka marinka Hormuz inay dib uga noqdaan marinka.

    TankerTrackers waxay sheegtay in dib u gurashadaas ay weheliyay “rasaas la riday.”

    Warbaahinta Iran ayaa sidoo kale faafisay warbixintan iyadoo soo xiganaysa ilo isku mid ah.

    Sida uu sheegay TankerTrackers, mid ka mid ah maraakiibtaas ayaa ahaa supertanker ka diiwaangashan Hin diya , kaas oo siday ku dhawaad laba milyan oo fuusto oo Shidaal ah oo uu ka soo qaaday Ciraaq.

17. 18 Abriil 2026Markab kuwa Xamuulka ah oo lala eegtay walxaha qarxa meel u dhaw Cumaan

    Waxaan hadda helnay war cusub oo ka yimid ururka badaha UK ee (UKMTO) oo ku saabsan dhacdo ka dhacday meel qiyaastii 25 mayl dhanka badda ah u jirta waqooyi-bari ee Cuman.

    Waxay sheegeen in markab xamuul (container ship) lagu dhuftay “walax aan la aqoonsan oo qarax ama gantaal u eg,” taas oo sababtay dhaawac soo gaaray qaar ka mid ah kunteendharada xamuulka ee saarnaa markabka.

    Mas’uuliyiinta ayaa hadda baaritaan ku wada dhacdadan, sida ay sheegtay hay'addaUKMTO.

18. 18 Abriil 2026Iraan oo dib u furtay lix ka mid garoomada diyaaradeed

    Maghsoud Asadi Samani, oo ah xoghayaha ururka shirkadaha diyaaradaha Iran, ayaa sheegay in garoomada diyaaradaha ee Imam Khomeini International Airport iyo Mehrabad Airport ee magaalada Tehran, iyo sidoo kale garoomada Mashhad, Birjand, Gorgan, iyo Zahedan dib loo furay.

    Wuxuu sheegay in shirkadaha diyaaradaha ay isku diyaarinayaan inay bilaabaan duulimaadyo gudaha iyo kuwa caalami ah.

    shirkadaha diyaaradaha ayaa sidoo kale la faray inay helaan oggolaanshaha lagama maarmaanka ah isla markaana ay la shaqeeyaan hay'adda duulista hawada ee Iran.

    Horey, hay’adda duulista rayidka ayaa ku dhawaaqday in qayb ka mid ah hawada dalka iyo tiro ka mid ah garoomada diyaaradaha dib loo hawlgeliyay laga bilaabo maanta.

    Iyadoo la raacayo go’aankan, marinnada hawada ee qaybta bari ee dalka ayaa loo furay duulimaadyada caalamiga ah.

    Tan iyo bilowgii dagaalka 29-kii Maarso iyo weerarradii ay Israel iyo United States ku qaadeen Iran, hawada dalka ayaa si buuxda loo xiray.

    Intii uu socday dagaalka, Israa’iil iyo Mareykanka ayaa bartilmaameedsaday dhowr garoon diyaaradeed oo ku yaalla magaalooyin kala duwan oo Iran ah.

19. 18 Abriil 2026Maraakiibta oo helay fariimo uga imaanaya ciidamada badda ee Iran

    Ilo ka tirsan maraakiibta ganacsiga ayaa u sheegay Reuters in qaar ka mid ah maraakiibta ay heleen fariin raadiyo oo ka timid ciidamada badda Iran, taas oo sheegaysa in Strait of Hormuz mar kale la xiray.

    Ciidamada badda Iran ayaa u sheegay maraakiibta shidaalka qaada (tankers) in aan wax maraakiib ah loo oggolayn inay maraan marinka, sida ay ilo-wareedyadu sheegeen.

    Sida aan hore u soo sheegnay, ugu yaraan hal markab oo shidaal qaada ayaa sheegay inuu la kulmay rasaas kaga timid doomaha hubeysan ee Islamic Revolutionary Guard Corps (IRGC) gudaha marinka.

20. 18 Abriil 2026Hogaamiyaha ruuxiga ee Iran oo soo saaray fariin

    Farriintii ugu dambeysay ee qoraal ah ee loo nisbeeyo Hoggaamiyaha Sare ee Iran Mojtaba Khamenei ayaa maanta lagu daabacay warbaahinta Iran.

    Farriinta lagu xusayo Maalinta Ciidanka Iran, si cad looma xusin laba arrimood oo ay saraakiisha Iran dhowaan ka hadlayeen: Marunka Hormuz iyo wadaxaajoodyada u dhexeeya Iran iyo Mareykanka.

    Qayb ka mid ah farriinta ayaa uga digtay “cadowga” in ciidamada badda ee Iran ay diyaar u yihiin inay “dhadhansiiyaan qaraarka guul-darrooyin cusub,” iyadoo aan la bixin faahfaahin dheeraad ah.

    Sida dhacdooyin hore, tani waxay ahayd farriin qoraal ah oo laga soo xigtay Mojtaba Khamenei. Lama arkin si toos ah tan iyo markii uu noqday hoggaamiyaha sare bilowgii Maarso.