TOOS, Sarkaal ka tirsan Iran oo sheegay in wadahadallo ay la yeesheen Mareykanka si loo soo afjaro dagaalka laga gaaray horumar balse heshiis uusan dhoweyn

Tebin toos ah

1. 23 Daqiiqadood ka horKamala Harris: Trump waxaa dagaalka “ku soo jiiday” Netanyahu

   

   Xigashada Sawirka, Getty Images

   Madaxweyne ku-xigeenkii hore ee Mareykanka, Kamala Harris, ayaa sheegtay in Donald Trump “lagu jiiday” dagaal uu la galay Iran, taas oo ay ku eedeysay inuu ka dhashay dhiirrigelin ka timid Ra’iisul Wasaaraha Israa’iil, Benjamin Netanyahu.

   Khudbad ay ka jeedisay munaasabad lacag ururin ah Sabtidii, ayay u sheegtay dhagaystayaasha: “Wuxuu galay dagaal, waxaana ku jiiday Netanyahu,” ayay tiri Harris. “Aan arrintan si cad u sheegno — wuxuu galay dagaal aysan rabin shacabka Mareykanka, isagoo halis gelinaya nolosha askarta Mareykanka.”

   Ilaa haatan, Trump si toos ah uguma jawaabin Harris, balse wuxuu qoraal uu ku daabacay baraha bulshada ku sheegay in Israa’iil ay tahay “xulafada weyn” ee Mareykanka.

   Qoraalkiisa ayaa u dhignaa: “Haddii dadku jecel yihiin ama aysan jeclayn Israa’iil, waxay caddeysay inay tahay xulafada weyn ee Mareykanka. Waa dad geesiyaal ah, dhiirran, daacad ah, oo caqli badan, waxayna ka duwan yihiin kuwa kale ee muujiyay wajigooda dhabta ah xilliyada colaadda iyo xiisadda; Israa’iil si adag ayay u dagaallantaa waxayna taqaannaa sida loo guuleysto!”

   Warar dheeraad ah:

   Faa'iidada aadan ku baraarugsanayn ee maskaxdaadu ka hesho hurdada indha gaduudsiga maalintii

   Warrarkii ugu dembeeyey ee marinka Hormuz oo Iiran mar kale xirtay, xilli maraakiib la weeraray

2. Saacad ka horMaxaa ka jira in Somaliland ay saldhig siisay Israa'iil?

   

   Xigashada Sawirka, Social

   Warbixin uu wargeyska Maraykanka ee Bloomberg daabacay toddobaadkan ayaa lagu sheegay in Israel ay wada-hadallo la yeelatay Jamhuuriyadda Iskeed ugu Dhawaaqday Madax-bannaanida ee Somaliland, kuwaas oo khuseeya iskaashi amni, si gaar ah in saldhig ay ka helaan gobolkaas, ay suurtagalnimada ka mid tahay.

   Warbixinta ayaana sheegtay in goobta sida gaarka ah isha loogu hayaa ay tahay magaalo xeebeedda Berbera, qorshuhuna yahay in saldhiggaas ciidan lagaga hortago xoogagga Xuutiyiinta ee Yemen, sida oo Kalena lagala soconaya xaalka amni ee Badda Cas.

   Haddaba BBC-da oo faahfaahin dheeraad iyo jiritaanka dhacadadan xaqiijinaysa ayaa waraysi gaar ah la yeelatay Wasiirka Arrimaha Dibadda ee Somaliland Cabdiraxmaan Daahir Aadan, kaas oo gebi ahaan ba meesha ka saaray qorshaha 'saldhigga' ee maalmihii u dambeeyey warbaahinta ku baahay.

   Wasiirka ayaa sheegay in Somaliland iyo Israel ay leeyihiin xidhiidh ku dhisan aqoonsi is-dhaafsi ah. Wuxuu yidhi "labada dal" si rasmi ah ayay isu aqoonsadeen 'midba midka kale', taas oo u oggolaanaysa xidhiidh diblomaasiyadeed iyo mid dhaqaale, balse aysan ku jirin wax heshiisyo militari ah.

   Markii la weydiiyay wararka sheegaya in Israel loo oggolaaday saldhig ciidan oo ku yaal Somaliland, wasiir Cabdiraxmaan ayaa si cad u beeniyay.

   Halkan ka sii akhri sheekada dhamaystiran

3. 2 Saacadood ka horMaxaa ceelka shidalka ee Soomaaliya laga qodayo ka dhigaya kan labaad ee ugu dheer dunida?

   

   Xigashada Sawirka, Reuters

   Markab laga leeyahay dalka Turkiga oo lagu magacaabo Cagri Bey ee jimcihii la soo dhaafay lagu soo shaweyay xeebta magaalada Muqdisho si uu u bilaabo mashruucii ugu horeeyay ee shidaal baaris ah oo laga sameeyo badda hoose.

   Wasiirka Tamarta ee Turkiga Alparslan Bayraktar ayaa sheegay in mashruucan uu calaamad u yahay "waa cusub oo u baryay baarista batroolka Turkiga."

   Dhanka kale, wasiirka batroolka Soomaaliya, Daahir Shire Maxamed ayaa yiri "Maanta waa maalin taariikhi ah oo Soomaaliya ay =soo dhaweyneyso markabka Turkiga ee qodaya shidaalka, sidoo kale waa rajo cusub iyo tallaabo wanaagsan oo in laga faa'iideysan karo shidaalka."

   Sida ay sheegtay dowladda Turkigu, ceelkaan ayaa noqonaya kan labaad ee ugu dheer dunida ceelasha shidaal ee laga qodo gudaha badda.

   Sababta ka dhigaysa ceelkaan mid aad u dheer ayaa lagu qeexay in ay tahay laba sababood:

   Halkan ka sii akhri sheekada

4. 3 Saacadood ka horWar hadda ka soo kordhay Iiraan

   Guddoomiyaha baarlamaanka Iraan, Mohammad Bagher Ghalibaf, ayaa sheegay in inkastoo "horumar laga gaaray" wadahadallada lagu soo afjarayo dagaalka kala dhexeeya Maraykanka, haddana labada dhinac ay wali "ka fog yihiin doodaha ugu dambeeya".

   Ghalibaf, oo ka mid ah xubnaha Iraan u matalaya wadahadallada, ayaa toddobaadkii hore ku sugnaa dalka Pakistan isagoo halkaas kula kulmay ergooyin ka socday Maraykanka, oo uu ku jiro Madaxweyne ku-xigeenka JD Vance, si ay uga wada hadlaan nabadda.

   Weli lama cayimin taariikhda rasmiga ah ee uu qaban doono wareegga xiga ee wadahadalladaas.

5. 3 Saacadood ka horMadaxweyne ku-xigeenkii hore ee Maraykanka oo sheegtay qofka Trump ku riixay dagaalka Iiraan

   

   Madaxweyne ku-xigeenkii hore ee Maraykanka, Kamala Harris, ayaa sheegtay in Donald Trump uu dagaalka Iraan ku riixay Ra'iisul Wasaaraha Israa'iil, Benjamin Netanyahu. Ma aysan soo bandhigin wax caddayn ah oo ku saabsan sheegashadan, balse waxay ku adkaysatay in dadka Maraykanku aysan doonayn iskahorimaadkan.

   Iyadoo ka hadlaysay munaasabad ay lahaayeen haweenka xisbiga Dimuqraadiga oo ka dhacday Michigan, Ms. Harris waxay sheegtay in Madaxweyne Trump uu dagaalka u isticmaalayo inuu indhaha dadka kaga leexiyo faylal lala xiriirinayo dambiilihii galmada ee geeriyooday Jeffrey Epstein oo la baahiyay.

   Toddobaadkii hore, Ms. Harris waxay sheegtay inay si firfircoon u tixgelinayso inay mar kale u tartanto xilka madaxtinimada, ka dib markii looga guuleystay isku daygii hore ee ay kula tartantay Mr. Trump.

6. 4 Saacadood ka horXog cusub oo ka soo korortay xaaladda hoggaamiyaha sare ee Iran Mojtaba Khamenei

   

   Xigashada Sawirka, Reuters

   Hoggaamiyaha cusub ee sare ee Iran, Mojtaba Khamenei, ayaa wali ka kabanaya dhaawacyo darran oo wejiga iyo lugaha ah oo ka soo gaaray weerarkii cirka ahaa ee lagu dilay aabbihii billowgii dagaalka, sida ay saddex qof oo u dhow saaxiibbadiisa gaarka ah u sheegeen wakaaladda wararka ee Reuters.

   Wejiga Khamenei ayaa ku doorsoomay weerarkii lagu qaaday xarunta hoggaamiyaha sare ee bartamaha Tehran, wuxuuna dhaawac weyn ka soo gaaray mid ama labada lugoodba, sida ay sheegeen dhammaan saddexda ilood.

   Si kastaba ha ahaatee, 56-jirkan ayaa ka kabanaya dhaawacyadiisii, maskaxdiisuna wali waa mid firfircoon, sida laga soo xigtay dadkan codsaday in aan magacyadooda la sheegin.

   Wuxuu ka qayb qaadanayaa kulamo uu la leeyahay mas'uuliyiinta sare isagoo adeegsanaya shirarka cod ahaan, wuxuuna ku lug leeyahay go'aan ka gaarista arrimaha waaweyn oo ay ka mid yihiin dagaalka iyo wada-xaajoodyada lala leeyahay Washington, sida ay sheegeen laba ka mid ah ilahaas.

   Su'aasha ku saabsan in caafimaadka Khamenei ee u oggolaanaysa inuu maamulo arrimaha dawladda ayaa timid xilli Iiraan ay ku jirto xilligii ugu xasaasisaneed muddo tobanaan sano ah.

   Halkan ka sii akhri sheekada

7. 4 Saacadood ka horKuuriyada Waqooyi oo qaaday tallaabo kale oo ay dalalka deriska lahi ka digeen

   

   Xigashada Sawirka, KCNA via REUTERS

   Kuuriya Waqooyi ayaa Axaddii dhowr gantaal oo nooca balastigga ah ku ridday badda ku taal xeebta bari.

   Kuuriya Koofureed iyo Jabbaan ayaa sheegay in tani ay tahay tii ugu dambeysay ee tijaabooyin xiriir ah oo ay Pyongyang samaynayso si ay u xoojiso awooddeeda milateri. Tani waa tijaabadii toddobaad ee gantaallada balastigga ah oo ay Kuuriya Waqooyi samayso sannadkan, waana markii afraad ee bisha Abriil gudaheeda ah.

   Lim Ul-chul, oo ah borofisoor ka tirsan Jaamacadda Kyungnam ee Kuuriya Koofureed, ayaa yiri: "Iyadoo Mareykanku uu diiradda saarayo Iran, Kuuriya Waqooyi waxay u aragtaa xaaladdan fursad dahabi ah oo ay ku casriyeynayso awooddeeda nukliyeerka iyo gantaallada."

   Xafiiska madaxtooyada Kuuriya Koofureed ayaa ku dhawaaqay inuu qabtay kulan degdeg ah oo dhanka amniga ah ka dib falkan.

   Tijaabooyinka noocan ah ayaa loo arkaa xadgudub ka dhan ah go'aammada Golaha Ammaanka ee Qaramada Midoobay ee ku saabsan barnaamijka gantaallada Kuuriya Waqooyi, balse Pyongyang ayaa diidday xayiraaddaas, iyadoo ku tilmaamtay inay tahay xadgudub ka dhan ah xuquuqdeeda madaxbannaanida ee is-difaaca.

   Sida ay sheegeen milateriga Kuuriya Koofureed, gantaallada ayaa laga soo riday agagaarka magaalada Sinpo ee xeebta bari ee Kuuriya Waqooyi, abaara 6:10 subaxnimo xilliga deegaanka.

8. 5 Saacadood ka horRuushka oo ku celiyey war uu marar badan sheegay oo ku saabsan Iiraan

   Alexei Likhachev, oo ah madaxa shirkadda tamarta nukliyeerka ee dawladda Ruushka ee Rosatom, ayaa soo jeediyay in Ruushku uu ka caawin karo Iran wareejinta yuraaniyamka la hodmiyay. Warkan ayaa shalay lagu daabacay barta Telegram-ka ee warshadaha ee "Strana Rosatom".

   "Marka laga yimaaddo caqabadaha farsamo, qayb muhiim ah oo ka mid ah heshiisyada mustaqbalka ee u dhexeeya Maraykanka iyo Iran waa arrinta kalsoonida," ayuu yiri Likhachev.

   Mr. Likhachev ayaa intaas ku daray: "Marka la eego arrintan, kaliya Ruushka ayaa khibrad wanaagsan u leh iskaashiga dhinaca Iran.

   Sannadkii 2015, codsi ka yimid Iiraan ayaan horay uga wareejinnay yuraaniyam la hodmiyay, maantana waxaan diyaar u nahay inaan ka caawinno arrinkaas."

   Labo maalmood ka hor, Donald Trump ayaa ku sheegay in heshiis lala galo Iiraan uu yahay mid "aad u dhow" iyo in Teheran ay ogolaatay inay wareejiso qiyaastii 440 kiiloogaraam oo yuraaniyam la naaxiyey ah, balse afhayeenka wasaaradda arrimaha dibadda ee Iiraan ayaa beeniyay warkaas.

   Bilowgii bishii Maarso, Rosatom waxay bilowday geedi socodka ay shaqaalaheeda kaga saarayso dhismaha tamarta nukliyeerka ee Bushehr, iyadoo hakisay dhismihii halkaas ka socday.

9. 9 Saacadood ka horCiidamada Israa’iil oo war cusub soo saaray

   Ciidanka Difaaca Israa’iil (IDF) ayaa sheegay in askari uu dhintay ka dib markii uu ku dhaawacmay dagaal ka dhacay koonfurta Lubnaan maalintii Jimcaha.

   Tani waxay daba socotaa xabbad-joojin 10 maalmood ah oo u dhaxaysay Lubnaan iyo Israa’iil, taas oo bilaabatay 16-kii Abriil.

   War qoraal ah oo ay soo saareen, IDF waxay ku sheegeen in askarigu uu "u dhintay dhaawacyadii soo gaaray ka dib markii lagu dhaawacay dagaal" ka dhacay aaggaas. Sidoo kale, saddex askari oo kale ayaa ku dhaawacmay, sida ay sheegeen IDF.

   Ma jiraan faahfaahin dheeraad ah oo laga bixiyay dhacdadan.

   Mar sii horreysay, IDF waxay sheegeen inay "diyaar-garow sare ku jiraan, ayna sii wadi doonaan inay ka saaraan khataraha koonfurta Lubnaan, guud ahaan aagga u dhexeeya xadka Israa’iil iyo xariiqda loo qoondeeyay," iyagoo intaas ku daray in tani ay tahay "mid waafaqsan fahamka xabbad-joojinta."

   Maalintii Jimcaha, warbaahinta dowladda Lubnaan ayaa sheegtay in weerar dhinaca cirka ah oo ay fulisay Israa’iil uu ku dhintay hal qof.

10. 19 Abriil 2026Guddoomiyaha Barlamaanka Iiraan oo fariin u diray shacabkiisa iyo qodobo kale oo ka hadlay

    

    Xigashada Sawirka, WANA/Reuters

    Guddoomiyaha Baarlamaanka Iiraan, Mohammad Bagher Ghalibaf, ayaa ku tilmaamay go’doominta Mareykanka ee dekedaha Iiraan “go’aan si xun loo qiimeeyay oo khaldan”.

    "Waxaan hore u sheegay haddii aysan qaadin go'doominta, in xaqiiqdii la xaddidi doono isu-socodka minka," ayuu Ghalibaf u sheegay telefiishanka qaranka Iiraan.

    Farriin muuqaal ah oo uu u diray shacabka Iiraan, Ghalibaf ayaa sheegay in Marinka Hormuz uu yahay mid "ay gacanta ku heyso" Iiraan.

    Waxa uu sidoo kale sheegay in markii uu Maraykanku rabay inuu fuliyo hawlgallo miino-baaris ah oo ka dhex dhaca marinka, ay Iiraan “si adag u istaagtay ayna ka hortagtay” Maraykanka.

    “Waxaan u aragnay arrintan xad-gudub ka dhan ah xabbad-joojinta, waxaanna sheegnay haddii ay tallaabadaas qaadaan, inaan weerari doono,” ayuu yiri Ghalibaf.

    Ghalibaf ayaa noqday mid ka mid ah shaqsiyaadka ugu muhiimsan nidaamka Iiraan tan iyo markii dagaalku bilowday, wuxuuna hoggaaminayay wafdigii wadahadalladii u dambeeyay ee u dhexeeyay Mareykanka iyo Iiraan ee ka dhacay Islamabad.

11. 18 Abriil 2026Abiy Axmed: 'Geeska Afrika nabad lagu wada joogi maayo hadii aan Itoobiya bad helin'

    

    Xigashada Sawirka, Getty Images

    Gobolka Geeska Afrika ma heli doono nabad ilaa Itoobiya ay hesho marin badeed, ayuu yiri Ra'iisul Wasaare Abiy Axmed.

    Waxa uu sheegay in arrinta ku saabsan badda Itoobiya ay tahay mid looga baahan yahay dhammaan shacabka iyo hay'adaha sheeganaya inay ka walaacsan yihiin horumarka iyo nabadgalyada gobolka in ay il gooni ah ku eegaan.

    Wareysi gaar ah oo uu siiyay warbaahinta qaranka dalka Itoobiya ee EBC, oo laga sii daayay labo qeybood ayuu ku sheegay in bad la'aantu ay abuureyso liidnimo in Itoobiya aysan ku tartamin warshadaha.

    "Waxyaabaha ugu waaweyn ee Itoobiya u diidaya inay noqoto dal quudiya muwaadiniintiisa, oo isku filan oo tartan caalami ah gali kara waa dekedo la'aan."

    Kadib markii dhawaan ay Iran xirtay marin biyoodka Hormuz ayaa waxa uu saamayn ku yeeshay wadamada oo caalamka ah.

    Halkan ka sii akhri sheekada

12. 18 Abriil 2026Waa kuma sarkaalka sare ee ka tirsan ciidamada Ilaalada Kacaanka Iiraan ee gaaray Ciraaq?

    Sarkaal sare oo Ciraaqi ah ayaa u sheegay AFP in taliyaha Ciidanka Quds ee Ilaalada Kacaanka Iiraan, Ismaaciil Qaaani, uu Sabtidii gaaray caasimadda Ciraaq ee Baqdaad, taasoo ah booqashadiisii ugu horreysay tan iyo markii xabbad-joojinta u dhexeysa Mareykanka iyo Iiraan ay dhaqan gashay 8-da Abriil.

    Booqashadan, oo ay sidoo kale xaqiijiyeen ilo ka tirsan “Qaab-dhismeedka Isku-duwidda” iyo kooxaha hubeysan, ayaa ujeedadeedu tahay inuu kulamo la yeesho hoggaamiyeyaasha siyaasadda iyo wakiillo ka socda kooxaha hubeysan si looga wada hadlo saameynta dagaalka Bariga Dhexe iyo sida uu u saameynayo Ciraaq.

    Sarkaalku wuxuu tilmaamay in Qaaani uu doonayo inuu isku dubbarido mowqifyada xulafada Tehran isla markaana uu hubiyo in xaaladda amni aysan ka sii darin muddadan xasaasiga ah, iyadoo diiradda la saarayo arrinta “dejinta xiisadaha gobolka”.

    Booqashadan aan hore loo shaacin waxay ka tarjumaysaa caqabadaha weli horyaalla hoggaamiyeyaasha Ciraaq ee ku aaddan ilaalinta dheelitirnaan jilicsan oo u dhexeysa labada xulafo ee isdiidan, Washington iyo Tehran, gaar ahaan ka dib markii gudaha Ciraaq uu saameeyay khilaafka gobolka iyada oo ay is-weydaarsadeen weerarro kooxo ay Iiraan taageerto iyo danaha Mareykanka.

13. 18 Abriil 2026Ciidamada Iiraan oo war hor leh soo saaray Hormuz

    Faahfaahino dheeraada ayaa ka soo baxaya ciidamada badda ee Iiraa, waxayna sheegayaan in laga bilaabo fiidnimada caawa uu xiran yahay Marinka Hormuz, ilaa inta laga qaadayo go'doominta uu Mareykanku ku hayo dekedaha Iiraan.

    Bayaan ka soo baxay Ciidanka Ilaalada Kacaanka Islaamiga ah (IRGC) ayaa looga digay in "aysan jirin wax markab ah oo ka dhaqaaqi kara halka uu ku xiran yahay ee Gacanka Faarisi ama Badda Cumaan."

    Waxay sidoo kale sheegeen in dhowr markab ay mareen marinka tan iyo xalay iyagoo hoos imanaya maamulkooda, balse marin-biyoodka dib loo xiri doono ilaa Mareykanku joojiyo go’doominta dekedaha Iiraan.

    Bayaanka ayaa lagu soo gabagabeeyay: "U dhawaanshaha Marinka Hormuz waxaa loo tixgelin doonaa iskaashi lala leeyahay cadowga, markabka ku xadgudba amarkaasna waa la beegsan doonaa."

14. 18 Abriil 2026Kabtanka ku go'doonsan markabka ayaa sheegay in shaqaaluhu ay rajeynayaan 'in ay ku laabtaan guryahoodii'

    Kabtan Raman Kapoor ayaa ku xanniban, isaga iyo 23 xubnood oo ka tirsan shaqaalihiisa, markab shidaal qaada oo ku dhow marinka Hormuz tan iyo markii uu dagaalku bilowday.

    Wuxuu u sheegay barnaamijka Weekend ee BBC n shaqaalihiisu ay la dareemayaan “dareenno isku dhafan” tan iyo markii dagaalku bilaabmay. Wuxuu sidoo kale sheegay inay toddobaadyadii u dambeeyay si joogto ah u arkeen gantaallo iyo qarax ka dhacay meel u dhow markabkooda.

    Si kastaba ha ahaatee, wuxuu intaas ku daray inay si dulqaad leh oo xirfad leh u sugayeen xaaladda.

    “Waxaan rajeynaynaa inaan dib ugu laaban doono guryaheena,” ayuu yiri.

15. 18 Abriil 2026wasiir ka tirsan Iran: Iran diyaar uma aha inay wadahadalo dheeraad ah la yeelato Maraykanka,

    

    Xigashada Sawirka, Getty Images

    Ku-xigeenka Wasiirka Arrimaha Dibadda ee Iran ayaa sheegay in dalkiisu uusan diyaar u ahayn wareeg cusub oo wadaxaajoodyo fool-ka-fool ah oo uu la yeesho Mareykanka, sida ay sheegtay wakaaladda wararka ee AP.

    Sababtuna ayuu wasiirka ku sheegay inay tahay in Washington aysan diyaar u ahayn inay ka tanaasusho waxa uu ku tilmaamay dalabyo “xad-dhaaf ah” oo ku saabsan arrimo muhiim ah.

    Saeed Khatibzadeh ayaa sidoo kale AP u sheegay in Tehran aysan u wareejin doonin uranium-keeda la kobciyay Mareykanka, isagoo arrintaas ku tilmaamay “mid aan suurtagal ahayn”, inkastoo hadallo ka duwan uu Jimcihii sheegay Madaxweynaha Mareykanka, Donald Trump.

    Khatibzadeh wuxuu sheegay in xiriir uu jiray oo u dhexeeya labada dhinac, balse Iran ay rabto in marka hore la dhammeeyo “heshiis qaab-dhismeed”ka hor inta aan la gelin wadaxaajoodyo toos ah.

    Wuxuu intaas ku daray in Mareykanka uu u baahan yahay inuu “fahmo oo wax ka qabto walaacyada ugu waaweyn” ee Iran, oo ay ka mid yihiin cunaqabateynta lagu soo rogay dalka.

    Horaantii maanta, Trump ayaa sheegay in ay socdaan “wada hadallo aad u wanaagsan” oo u dhexeeya Mareykanka iyo Iran.

16. 18 Abriil 2026Golaha Sare ee Amniga Qaranka Iran: Waxaan darseynaa soo jeedinno cusub oo ka timid Mareykanka.

    Golaha Sare ee Amniga Qaranka ee Iran (SNSC) ayaa maanta ku dhawaaqay in dalka uu daraasad ku samaynayo “soo-jeedimo cusub” oo ka yimid Mareykanka, isagoo sidoo kale ka digay in wadahadallada Iran aysan wax tanaasul ah u samayn doonin Washington.

    War-saxaafadeed uu goluhu soo saaray oo lagu daabacay warbaahinta rasmiga ah ayaa lagu yiri: “Maalmihii u dambeeyay, iyadoo taliyaha ciidanka Pakistan uu ku sugnaa Tehran oo dhexdhexaadin ka ah wadaxaajoodyada, Mareykanku wuxuu soo bandhigay soo-jeedimo cusub, kuwaas oo Jamhuuriyadda Islaamiga ah ee Iran ay hadda daraasad ku hayso, welina jawaab kama bixin.”

    War-saxaafadeedka ayaa intaas ku daray in wafdiga wadaxaajoodyada Iran “uusan sameyn doonin wax tanaasul ah, dib u gurasho, ama heshiis dhexdhexaad ah, isla markaana uu si buuxda u difaaci doono danaha shacabka Iran.”

    Soo bandhigista soo-jeedimahan cusub ayaa timid saacado kadib markii Iran ay ku dhawaaqday inay dib u xidhay marinka Hormuz, iyadoo jawaab u ah xayiraadda joogtada ah ee Mareykanka ku hayo dekedaheeda. Tani waxay keentay in Madaxweynaha Mareykanka Donald Trump uu uga digto Washington isku day kasta oo “caburin” ah.

    Golaha Sare ee Amniga Qaranka ayaa sheegay in “Iran ay go’aansatay inay si buuxda u maamusho oo u kormeerto maraakiibta mara marinka Hormuz ilaa dagaalku gebi ahaanba ka dhammaanayo,” isagoo xusay in xayiraadda Mareykanka ay ka hortagayso xitaa “furitaan xaddidan oo shuruudo ku xiran.”

17. 18 Abriil 2026Tehraan ayaa ugu baaqday Ururka Iskaashiga ee Shanghai inuu cambaareeyo weerarada Israel iyo Mareykanka ee Iran

    Jamhuuriyadda Islaamiga ah ee Iran ayaa ugu baaqday Ururka Iskaashiga Shanghai (SCO) inuu cambaareeyo weerarradii dhowaan ay fuliyeen Mareykanka iyo Israa’iil.

    Wakaaladda wararka ee rasmiga ah ee IRNA ayaa sheegtay in Mohammad Rasoul Jafari, wakiilka joogtada ah ee Iran u fadhiya SCO, uu codsigan u gudbiyay isagoo ku hadlaya magaca Tehran.

    Ururka Iskaashiga Shanghai (SCO) wuxuu leeyahay 10 xubnood oo rasmi ah, kuwaas oo ay ku jiraan Iran, Pakistan, iyo Belarus. Afghanistan iyo Mongolia waa xubno kormeere ah, halka 16 dal—oo ay ka mid yihiin Turkey, Azerbaijan, Masar, Qatar, iyo Imaaraadka Carabta—ay yihiin “la-hawlgalayaal wada-hadal” ee ururka.

    Doorka ururkan badanaa waa mid astaan uun ah , balse wuxuu siinayaa hoggaamiyeyaasha fursad ay ku muujiyaan aragtiyahooda iyo dhaliilaha ay wadaagaan.

18. 18 Abriil 2026Hindiya:Laba markab oo calanka Hindiya sita ayaa ku lug lahaa 'shil toogashada' oo ka dhacay Strait - wasaaradda arrimaha dibadda

    Xoghayaha Arrimaha Dibadda ee Hindiya, Vikram Misri, ayaa sheegay inuu ka walaacsan yahay dhacdo rasaas ah oo galinkii hore ee Sabtidii uga dhacday laba markab oo sita calanka Hindiya kuwaas oo marayay marinka Hormuz.

    War uu soo saaray, Misri wuxuu ugu baaqay Iran inay dib u bilowdo fududeynta maraakiibta u socda Hindiya si ay uga gudbaan marinka si nabad ah.

    Tani waxay daba socotaa warbixinno ka yimid haya'adda badaha UK ee (UKMTO) oo sheegtay in saddex markab—mid shidaal sida, mid xamuul ah, iyo mid rakaab ay dhammaantood soo sheegeen dhacdooyin ka dhacay xeebaha Cumaan Sabtidii.

19. 18 Abriil 2026Safiirka Iran u fadhiya Hindiya ayaa looga yeeray wasaaradda arrimaha dibadda ee dalkaas

    Wasaaradda Arrimaha Dibadda ee Hindiya ayaa u yeertay safiirka Iran, waxayna muujisay walaac weyn oo ay ka qabto rasaasta lagu furay laba markab oo sita calanka Hindiya kuwaas oo marayay marinka Hormuz.

    Iyadoo tixraacaysa in Iran horey u siisay marin ammaan ah dhowr markab oo u socday Hindiya, Wasaaradda Arrimaha Dibadda ee Hindiya ayaa safiirka Iran ka codsatay inuu aragtida dowladdiisa u gudbiyo mas’uuliyiinta Iran, isla markaana dib loo bilaabo sida ugu dhaqsaha badan fududeynta maraakiibta u socda Hindiya inay si nabad ah uga gudbaan marinka Hormuz.

    Waxaa horey loo sheegay in Ciidamada Ilaalada Kacaanka (IRGC) ay ku qasbeen laba markab oo Hindi ah oo marayay galbeedka marinka Hormuz inay dib u laabtaan.

    Website-ka Tanker Trackers, oo la socdo dhaqdhaqaaqa maraakiibta shidaalka, ayaa sheegay in dib u noqoshadaas lagu qasbay ay la socotay “rasaas la furay.”

20. 18 Abriil 2026Dhacdooyiinkii ugu waawaynaa ee maanta ka dhacay marinka hurmuz

    

    Xigashada Sawirka, Reuters

    Weerar maraakiibta Laba doon oo dagaal oo ka tirsan Ciidanka Ilaalada Kacaanka Islaamiga ah ee Iran (IRGC) ayaa rasaas ku furay markab shidaal sida marayay marinka Badda ee Hormuz, sida ay sheegtay hay'adda badaha UK ee UKMTO). Shaqaalaha markabka ayaa la sheegay inay bad qabaan.

    Markab xamuul oo konteenarro sida ayaa sidoo kale waxaa ku dhacay “gantaal aan la garanayn” meel 25 mayl-badeed u jirta waqooyi-bari Cumaan, taas oo waxyeello gaarsiisay qaar ka mid ah konteenarradii, ayay UKMTO sheegtay.

    Marinka Hormuz Golaha Amniga Qaranka Sare ee Iran (SNSC) ayaa sheegay inuu “go’aansaday” inuu gacanta ku hayo marinka ilaa dhammaadka dagaalka.

    Tani waxay timid kadib markii IRGC ay sheegtay in marinku “ku laaban doono xaaladdiisii hore”, iyadoo ciidamada qalabka sida ay si buuxda u maamulayaan aagga.

    Madaxweynaha Mareykanka Donald Trump ayaa sheegay inuusan ogolaan doonin inay Iran “ caburiso” Mareykanka.

    Dhanka kale, Mareykanka ayaa sheegay inuu celiyay 23 markab tan iyo markii uu bilaabay xayiraadda badda 13-kii April.

    Golaha qaranka Iiraan ayaa xayiraadda ku tilmaamay mid jebinaysa heshiiska xabbad-joojinta.

    Lubnaan

    Askari Faransiis ah oo ka tirsanaa howlgalka nabad ilaalinta Qaramada Midoobay ayaa la dilay, sida uu sheegay Madaxweyne Emmanuel Macron. Wuxuu tilmaamay in Hisbullah ay mas’uul ka tahay, balse kooxda Iran taageerto ayaa beenisay eeddaas.

    Ciidamada Difaaca Israa’iil (IDF) ayaa sheegay inay dhiseen xariiq amni oo loo yaqaan “yellow line” ama khadka cagaaran oo ku taal koonfurta Lubnaan, isla markaana ay duqeeyeen “argagixiso” ku soo dhowaaday askartooda.