Ndị ahịa akọwaala ihe kpatara ọkụ ọgbụgba n'ahịa Head Bridge Ọnịcha

Ụfọdụ ndị ahịa ekwuola na ọ bụghị nsogbu ọkụ latrik kpatara ọkụ gbara n'ahịa 'Bridge Head' dị n'Ọnịcha n'Anambra Steeti.

Ha kwuru na ọkụ ọgbụgba ahụ metụtara ihe rụrụ ọnụụlọ ahịa iri na abụọ n'ime ahịa ahụ.

Dịka ụfọdụ ndị ahịa si kwuo, a na-agbanyụ ebe ọkụ latrik si abata n'ime ahịa ahụ ma o jiri ọkara gaa elekere anọ nke mgbede.

Ha kwuru na ọkụ latrik adịghị n'ụbọchị ihe a mere nke pụtara na ọ bụghị nsogbu ọkụ latrik kpatara ya.

Ihe ndị ọkụ lara n'iyi gụnyere: pịpụ, akpụkpọ ụkwụ nakwa sịramik.

Ọkụ agbariela mpaghara ahịa 'Bridge Head Market' Ọnịcha

Ọkụ tiwapụrụ n'ime abalị agbariela mpaghara ebe a na-ere akụrụngwa e ji arụ ọrụ mmiri n'ahịa 'Bridge Head' Ọnịcha dị n'Anambra Steeti.

Ọkụ ọgbụgba ahụ lara ọtụtụ ngwaahịa n'ihi ma bute ọnọdụ amaghị nke a ga-eme n'ahịa ahụ na-ekwo ekwo.

Akụkọ kwuru na ahịa ahụ dị n'okporoụzọ si Ọnịcha gawa Ọka baara ọkụ n'ụbọchị Fraịde abalị iri abụọ nke ọnwa Maachị afọ 2026 ma regide ọkụ ruo n'ụtụtụ Satọde abalị ịrị abụọ na otu nke ọnwa Maachị 2026.

Ndị hụrụ oge o mere kwuru na ọkụ ahụ malitere mgbe ọ fọdụrụ ihe dịka nkeji ise ka ọ kụọ elekere iri na abụọ nke etiti abalị, ma jiri ọsịịsọ fesaa na mpaghara dị iche iche tupu a kwụsị ya, nke mere o jiri raa ndị mmadụ ahụ ibupụ ngwaahịa ha.

Mbọ niile ndịahịa gbara iji nweeike bupụta ngwaahịa ha kụrụ afọ n'ala n'ihi etu ọkụ ahụ si agbasi ike.

Ka ọ dị, Onyeisi okpuru ọchịchị ime obodo Ọnịcha Saụt bụ Emeka Orji kpọtara ndị mgbanyụọkụ n'ahịa ahụ, nke mere e ji nweeike gbanyụọ ọkụ ahụ.