Cosgaisean goireasan spòrs sna h-Eileanan an Iar a' dol an-àirde

Thig àrdachadh suas ri 30% air na chosgas e a' dol gu ionadan-spòrs agus amaran-snàimh aig Comhairle nan Eilean Siar mar oidhirp dèiligeadh ri beàrn buidseit luach £180,000.

Chuir buill Comataidh an Fhoghlaim, Spòrs agus Sheirbheisean Chloinne an taic ri moladh cosgaisean a chur suas aig coinneimh Dimàirt.

Bìdh àrdachadh 15% air na chosgas ballrachd Slàinte Mhath bho thoiseach na h-ath-bhliadhna ionmhais, agus thèid prìsean dhaibhsan gun bhallrachd suas 30%.

Cha deach gabhail ri moladh lùghdachadh a thoirt air obair glanaidh aig Ionad Spòrs Leòdhais airson dèiligeadh ri easbhaidh de cha mhòr £49,000.

Chaidh aontachadh ri gearraidhean £75,000 bho roinn nan Goireasan Spòrs agus £15,000 bho Leasachadh Spòrs an-uiridh mar phàirt de bhuidseat 2025-26.

Dh'adhbharaich seo ùpraid mhòr sa choimhearsnachd oir am measg na bhathar a' moladh 's e amaran-snàimh Lìonail agus Shiaboist ann an Leòdhas a dhùnadh.

Chaidh dàil air co-dhùnadh agus chuir comhairlichean an taic ri co-luadar poblach san t-Sultain an-uiridh a fhuair 1,649 beachdan, is a dh'fhàg nach deach na molaidhean sin air adhart sa bhliadhna ionmhais seo.

Chuala comhairlichean an t-seachdain seo gun robh am poball gu mòr airson seirbheisean a ghlèidheadh ach gun robh iad cuideachd ag iarraidh gum bi iad nas earbsaiche agus nas seasmhaiche.

Cho-dhùin comhairlichean dàil a chur air gearradh san t-seirbheis ghlanaidh airson a' chiad chairteal den bhliadhna ionmhais ùir feuch dè an teachd a-steach a bhiodh ann bho na cosgaisean ùra.

Bha rabhadh san aithisg gur dòcha gum feumadh beachdachadh às ùr air gearraidhean san t-seirbheis mura faighte teachd a-steach gu leòr.

A bharrachd air na sàbhalaidhean £90,000 ris an do dh'aontaich iad airson na bliadhna ionmhais seo, chuala buill na comataidh gun robh dùbhlain airgid nas motha gu bhith ron t-seirbheis spòrs.

Thuirt Fear-Gairm na Comhairle, Coinneach MacLeòid: "Feumaidh sinn an teachdaireachd a sgaoileadh mun t-seirbheis - cleachd i neo caill i."