Serious bad weather hit parts of US as tornadoes, thunderstorms show face

Serious bad weather dey expected to stretch across di eastern United States on Monday.

Dis weather go bring tornadoes, thunderstorms, blizzard conditions and snow.

Ova one dozen states bin dey under a wind advisory on Monday morning, from Missouri to Maine, and tornado watches dey place in parts of Florida, Alabama and Georgia.

As much as 2ft (0.6m) of snow don fall for Wisconsin and northern Michigan since di storm start dis weekend, according to di National Weather Service (NWS).

Di bulk of di storm dey expected to exit off di east coast into di Atlantic by Tuesday, wit abnormally cold weather to continue.

Ova 11 million pipo dey under blizzard warnings, and anoda four million dey under winter storm warnings, according to di BBC media partner CBS News.

By Monday morning, over 2,000 flights don dey cancelled, and additional 7,000 flights delayed, according to flightaware.com.

Di bulk of di flight cancellations and delays bin dey for O'Hare International airport for Chicago and LaGuardia for New York.

Ova half a million customers dey witout power, most of dem dey for Michigan, and Ohio and Georgia follow as second and third, respectively.

For Minnesota, ova 20in (51cm) of snow bin fall for southeastern parts of di state by Sunday afternoon. Forecast show more snow and strong winds for Monday.

"Whiteout conditions dey expected and go make travel treacherous and potentially life-threatening," di NWS tok.

Minnesota Govnor Tim Walz don authorised di state National Guard to support emergency operations, CBS News tok.

Severe thunderstorms dey expected for parts of North Carolina, South Carolina and West Virginia, wia NWS don predict hail and "a tornado or two possible".

Severe thunderstorms dey expected for parts of North Carolina, South Carolina and West Virginia, wia NWS don predict hail and "a tornado or two possible".

Tornado warnings bin dey issued between 10:00 and 11:00 local time (15:00 and 16:00 GMT) for parts of northern Virginia. One similar warning bin dey issued for parts of di Florida Panhandle.

For North Carolina, wia wind gusts on Monday bin dey predicted to exceed 74mph (119km/h), Govnor Josh Stein bin encourage residents to enable emergency alerts on dia phones.

Schools for Raleigh and Chapel Hill, North Carolina bin close on Monday. Schools dey closed in some districts for Wisconsin and Minnesota.

Canadians dey also face serious bad weather on Monday, particularly for central Ontario and south-western Quebec. Forecasters for di region predict up to 20in of snow wit wind speeds up to 49mph, warning of "near zero visibility" for some areas.

On di US west coast, extreme heat watch dey scheduled to go into effect for parts of southern California, Arizona and Nevada later dis week.

Temperatures for southwest Arizona dey expected to reach up to 109F (42C), wia officials don warn about "significant increase" in chance of heat related illness.

On Wednesday, Phoenix fit get im earliest day of 100F-plus temperatures for nearly four decades.

DI high temperatures and dry, windy pattern dey also expected to increase wildfire danger across parts of di West and High Plains.

Ova di weekend for Nebraska, roughly 30 National Guard troops bin dey deployed to combat multiple wildfires, di state Emergency Management Agency tok.

Nearly 1,000 sq miles (1,609 sq km) bin already dey damaged as of Saturday, di agency tok. At least one fire-related fatality bin dey reported.

One storm system wey sama Hawaii on Saturday, including flood watches and nearly 24in of rain for Maui, begin to ease overnight on Sunday. One high wind warning remain in effect on Monday.

Wit im widespread impacts, forecasters say dis fit be one of di most significant weather events to hit di United States so far dis year, potentially affecting roughly 200 million pipo across multiple states.