Chelsea fine £10.75m for breaching Premier League rules

Chelsea don chop fine of £10m and oda suspensions afta dem admit say dem make £47m for secret payments to unregistered agents and third-parties ova transfers between 2011 and 2018.

Di club also chop suspension transfer ban sake of same offence.

Chelsea also chop immediate nine-month academy transfer ban and £750,000 fine ova di registration of academy players between 2019 and 2022.

Di Premier League report name some transfers related to di unregistered payments, including Eden Hazard, Samuel Eto'o, Willian, Ramires, David Luiz, Andre Schurrle and Nemanja Matic.

Di club accept di historical charges wey occur under Roman Abramovich ownership.

Di Premier League say "dem make undisclosed payments by third parties associated wit di club to players, unregistered agents and oda third parties" for di "benefit of Chelsea".

Chelsea self-report di potential breaches afta Todd Boehly consortium acquire di club for 2022.

"From di outset of dis process, di club don treat dis matters wit di utmost seriousness, providing full cooperation to all relevant regulators."

Di Premier League say Chelsea fit no breach dia Profitability and Sustainability rules during di seasons wey e happun, even if di payments dey registered and e therefore no go lead to points deduction to be appropriate punishment.

For 2023, di Blues chop fine of £8.6m by Uefa for "submitting incomplete financial information" for di period between 2012 and 2019.

Anoda separate FA disciplinary process wey dey investigate alleged "use of and di making of payments to unregistered agents" dey go on.

Chelsea win two Premier League titles, two FA Cups, one Champions League, one Europa League and one League Cup between di period of 2011-2018.

Dem employ six different permanent managers during di seven-year spell, though suggestion no dey say any head coach dey part of di wrong wey dem do.