In maps: Five days of strikes across di Middle East

US Defense Secretary Pete Hegseth tok say US submarine don sink one Iranian warship for di Indian Ocean, as di US-Israeli war wit Iran enta di fifth day.

Dem think say around 180 pipo bin dey on board di Iris Dena, wey dey near Sri Lankan waters, wen one torpedo hit am.

Israel on Wednesday tok say dem attack di "security headquarters" for di Iranian capital Tehran overnight, Basij paramilitary and missile sites across di city, and dem continue dia strikes for Lebanon.

Across di Middle East, Iranian strikes hit di US consulate for Dubai and US air base for Al Udaid for Qatar, di biggest American facility for di region.

President Donald Trump previously bin don warn say di strikes go continue for four or five weeks, as e add say di US get di "capability to go far longer dan dat".

US-based Human Rights Activists News Agency (HRANA) say according to reports, dem don kill 1,097 civilians for Iran since 28 February.

Six American military personnel don die since di conflict start, according to di US Central Command.

Where strikes don hit?

Di Israeli military bin announce extensive joint strikes wit di US on Saturday, as dem destroy air defences for western and central Iran plus di capital Tehran.

Di former Supreme Leader Ayatollah Ali Khamenei die for Tehran during di first wave of di strikes.

Sustained strikes don continue for di kontri since di military action start ova di weekend.

BBC Verify so far don confam di visual evidence of strikes on 13 different locations for Tehran, as strikes also land for 12 oda towns and cities across Iran.

For Minab, di south of Iran, at least 153 pipo wey include children die for one girls' school wen three missiles hit am on Saturday, Iranian state media report.

BBC neva fit independently verify am.

Dem don also target military sites for Kermanshah and Tabriz, and Iranian naval facilities for Konarak and Bandar Abbas for di south of di kontri.

Analysis of satellite imagery don show damage to at least three Iranian missile sites, plus di nuclear facility for Natanz.

On Wednesday, Israeli strikes bin target dozens of sites across Tehran, including di headquarters of di Basij paramilitary and missile launch pads and oda defence systems, one Israel Defense Forces (IDF) tok-tok pesin tok.

Israel don expand operations enta Lebanon, wia dem dey target Hezbollah, di militant group Iran for a very long time dey support.

Operations don focus on strongholds for di southern suburbs of Beirut and areas wey dey close to di city airport, plus sites for southern Lebanon.

One hotel dey among di buildings for di city wey attacks on Beirut hit on Wednesday.

Earlier, Israeli officials bin tok say dia troops don enta Lebanon and dem dey seize "strategic areas" in order to prevent attacks on Israeli border communities.

Di move bin come afta Israel announce say dem dey carry out strikes for both Iran and Lebanon afta Hezbollah launch missiles on Haifa earlier for di week.

At least nine pipo die and 27 injure for one missile strike on Israeli city of Beit Shemesh on Sunday.

Where Iran don strike?

Iran don retaliate wit strikes on Israel and US bases for di region, and dem don chop blames for air attacks on Gulf states.

On Tuesday night, Saudi officials tok say two drones hit di US Embassy for Riyadh, and e cause some minor damage and spark small fire.

Reports dey of new Iranian strikes on one major gas plant for Qatar, wia di Ministry of Defense later tok say dem shoot down two Iranian aircraft, seven missiles and five drones.

For di United Arab Emirates (UAE), wey include di tourist destinations of Dubai and Abu Dhabi, three pipo die and several pipo dey injured, di kontri defence ministry tok on Sunday.

Kuwait health ministry report one death on Sunday. Officials say ballistic missiles wey dem successfully intercept bin target di The Ali Al-Salem airbase.

Di kontri military crash three US fighter jets on Monday for inside "one friendly fire incident", US Central Command tok. All six crew dey safe and okay, dem tok.

For neighbouring Iraq, dem crash three drones on Monday ova Irbil airport wey host US-led coalition troops.

Bahrain National Communication Centre on Saturday tok say di service centre of di US Navy Fifth Fleet bin dey "subjected to missile attack".

Also for Bahrain, one verified clip, wey dem feem from one moving vehicle, show di moment wen one missile strike. Explosion follow immediately wey send fragments and wetin remain into di air.

On Sunday evening, one drone strike di US naval base and e cause major fire, one official tell BBC, but no reports of casualties.

Iranian attacks for Bahrain injure four pipo, di official add.

For Saudi Arabia, two drones hit di US embassy for di capital Riyadh and cause "limited fire" Saudi defence ministry tok on Tuesday.

Dem also report one fire for di Ras Tanura refinery, wey di kontri state oil company, Aramco dey manage afta dem intercept two drones, officials tok.

Officials for Jordan, wey dey di border of Israel, say dia armed forces shoot down ballistic missiles wey target dia territory.

Oman state news agency on Sunday report say two drones bin target Duqm commercial port, and one worker injure.

Wetin hapun for Indian Ocean and for Cyprus??

US Defense Secretary Hegseth on Wednesday tok say di US submarine sink "one Iranian warship wey tink say e dey safe for international waters".

One torpedo hit di Iris Dena, wey dem tink say get around 180 pipo on board, for di Indian Ocean off Sri Lanka.

Sri Lankan authorities tok say dem see around 80 bodies, and don rescue 32 pipo.

At midnight on Sunday, one Iranian drone crash into RAF Akrotiri for midnight (22:00 GMT Sunday), Cypriot President Nikos Christodoulides announce.

No casualties dey reported and di base sustain "minimal damage", but UK Ministry of Defence say dem don move family members.

On Monday, one Cypriot govment tok-tok pesin say dem intercept two more drones wey bin dey head towards RAF Akrotiri.

How di conflict dey affect di global economy?

Global oil and gas prices rise sharply on Monday, as producers, insurers and shipping firms dey affected by di war and di closure of di Strait of Hormuz.

Di cost of European gas bin rise ova 30% afta di world largest producer of liquefied natural gas (LNG), Qatar Energy, tok say dem dey pause production.

Qatar dey supply around a fifth of global LNG supplies.

Di past two days don see several reports of attacks on shipping for di Strait.